الاثنين، 30 نوفمبر 2009

الحلقه الاولى من ابجديه الامثال "أ،ب،ت "






أ


ألف دقن ولا دقنك



يقال دليل على اهميه الشخص وحبه له والمقصود بالدقن هى الذقن اسفل الفم

......................................................................................................................


ب




الباب المرجل يحوش القضا المستعجل



اى الباب المقفول يمنع القضاء القادم

وهذا مثل غير صحيح لان قضاء الله لا شئ يمكنه منعه



ت


تاجر ونجار




اى ان الشخص يصنع الشى مما يبيعه ثم يبيعه ايضا

او ممكن تقول من دقنه وافتلو

يالا نتقابل على خير فى المره الجايه

متنسوش تعليقاتكم

عشان انا زهقت

هوا انا بكتب لمين...

وكل سنه وانتو طيبين

الثلاثاء، 10 نوفمبر 2009

ابجديه الامثال ( قريبا فى حلقات )


ابجديه الامثال


هناك ابجديه للامثال الشعبيه القديمه


سوف نقوم بعرضها تباعا


على عده حلقات انتظرونا

الأحد، 23 أغسطس 2009

والان مع الحلقه الخامسه
من فات قديمه

اتحاد الاذاعه والتلفزيون
وتلفزيون دبى بالالوان 12 بوصه
بلاشتراك مع
(PATHWAYS TV) تلفزيون الباثواى

د كاسب وشركاه

يقدمون
(من فات قديمه)




حلقات رمضانيه بعنوان





يوميات برعى فى رمضان




بطوله ولاول مره منفردا بالبطوله النجم المحبوب




برعى ابن ست ابوها






تاليف
صفوت ربيع
(ابوعمار السويفى)

تصوير
بكاميراتنا الجديده
اللى جبتها مع المايك من سيبر ام محمد
وانا اللى هاصور

ويقوم بدور الراوى

فنان الاجيال (ابو عمار)

انتاج

(PATHWAYS TV) تلفزيون الباثواى

د كاسب وشركاه

اخراج
صفووووووووووووووووووووت

برعى اتسحر سحور اول يوم ونوى الصيام


صبح تانى يوم يشوف شغله

وطبعا كان جعان

بس لانه بيحب شهر رمضان جدا

لانه

بيرتاح من وش ستيته

ومن قرفها

لانه بيسيبلها البيت ويقعد يصلى فى الجامع بعد ما يرجع من الغيط

وينام فى الجامع

وطبعا ستيته مبتتكلمش

لانها مش قادره

الحر والصيام مقصرين عليها

ولما جه ظهر اول يوم فى رمضان

وقف برعى يتحسر على فوات شهر رمضان

ويقول
دايم الله يا رمضان مش باقى منك غير عشرتين وتسعه وباقى النهار
(هههههههههههه) برعى استعجل فوات رمضان قوى وقال انه خلص ومش باقى منه غير عشرتين " عشرين يوم" وتسعه" تسع ايام" وباقى النهار


دايم الله يا رمضان عشرتين وتسعه وباقى النهار



النهايه

السبت، 13 يونيو 2009




هذه الحلقه برعايه


سوق الهلايل(موضوع الحلقه التانيه)


نرجو من المشاهدين قبل قراءه هذه الحلقه
ان يراجعو الحلقات السابقه وخاصه الحلقه التانيه
الا طبعا متابعينا الاوفياء
سوق الهلايل
اكبر سوق لتجاره الحمير
لدينا من الحمير الكثير
ولكن احذرو من غباءهم
لدينا الحمار الامريكى
والحمار الروسى
والانجليزى والفرنساوى
ولدينا نوع جديد من الحمير
ولكن احذروا منه
لانه مبيجيش الا بالضرب
انه الحمار الاسرائيلى
ولكن احذروا من الحمار البلدى
لانه حمال الاسيه
وتذكروا جيدا ً
" اغبى انواع الحمير هو ما يعتقد انه من الخيول"

مع تحيات المعلم

سلومه الجحش



والان مع الحلقه الرابعه من المسلسل الكوميدى

من فات قديمه

اتحاد الاذاعه والتلفزيون
بلاشتراك مع
(PATHWAYS TV) تلفزيون الباثواى
يقدمون
(من فات قديمه)

بطوله نجم حوض ولاد ابو اسماعيل
تامر الحمش (بطل الحلقه التانيه)
بالاشتراك مع مراته نجمه الترعه الشرقيه
ستيته البخيله
والنجم القدير
محمدين افندى
(اخو تامر بس من ام واب تانيين)

تاليف
صفوت ربيع
(ابوعمار السويفى)

تصوير
المشكله مش فى التصوير المشكله فى المنتج مش رادى يجيب لنا كاميرات

ويقوم بدور الراوى

فنان الاجيال (ابو عمار)

انتاج

(PATHWAYS TV) تلفزيون الباثواى

اخراج
صفووووووووووووووووووووت


بعد الخناقه اللى كانت بين ستيته وتامر الحلقه التانيه
وهما اتصالحو بعديها
طبعا ً بشروط الطرف الاقوى
اللى هوا
هوا مين
طب ايه رائيكم نخلى الاجابه اخر الحلقه
ولا اقولكم نخليها سؤال واجابتو نعرفها من جوه الحلقه ماشى
وبعد ما اتصالحو وقاعدين فى البيت فى امان الله
الباب خبط(تق تق تق تق)
تامر: مين اللى بيخبط
محمدين: انا اخوك محمدين
تامر: قومى يا ستيته افتحى
ستيته: رجليا منمله
تامر: جاتك قطع رجلك ( فى سره طبعا)
طبعا تامر لانه مش عايز مشاكل واخو واقف بره

جه على نفسه ( زى كل مره) وقام فتح
تامر: ازيك يا محمدين عايز حاجه
محمدين: اما انت دغف صحيح دى مقابله
تامر: يوووووووووه نسيت خش
محمدين: ازيك يا ستيته
ستيته: اهلا يا محمدين اتفضل
محمدين :
عاملين ايه
تامر : خش فى الموضوع
محمدين : اوكيه مان انا عايز الحماره بتاعتكم

تامر : ليه
محمدين : هاجيب عليها طلبات من السوق

طبعا كل ده وستيته قاعده تتفرج
وبما ان تامرالحمش حمش وكلمته سيف قام بص لستيته وسكت ومقدرش يقول لاخو ايوا ولا لأ
واستنى شويه قامت ستيته قالت
ستيته: ومال خدها يا محمدين
وطبعا تامر سمع الاجابه قا رد
تامر : بس ابئى حطلها شويه برسيم
هههههههههههههه لا راجل يا تامر استنى لما ستيته ردت وبعدين اتكلم
بس كده الحلقه خلصت
ها مين بئى الطرف الاقوى من نظركم مستنى ردودكم

الأحد، 19 أبريل 2009

الحلق الثالثه من مسلسل من فات قديمه

الحلقه التالته
باللغه العربيه الفصحى





بعد قليل
الحلقة الثالثة من مسلسل من فات قديمه
فاصل اعلانى
هذه الحلقة برعاية سنتر المعلم دهشان للدروس الخصوصيه
لدينا دروس خصوصيه في جميع المواد
بتخفيضات هائله تصل الى 100%
بس انتو تيجو
لدينا مدرسين من العصر الحجرى فى كل المواد
وهذه قائمه بالمدرسين والمواد
لغة غريبه( انجليزي يعنى ) الاستاذ حركات
حساب والحاجات الرخمه دى الاستاذ خلاص
علوم هناك تشكيله رائعة بسعر المصنع
امثال الاستاذ حوزام واتباعه
ولدينا مدرسين بتوع عيال صغيره
امثال أستاذ شرانى
ولو عايزين عربى مش هتلاقو الا بطل حلقتنا
الاستاذ نحوى مرفوع بشده
وابنته الانسه كسره
تعالو بس عندنا هتلاقو اللى يعجبكم
ومتخافوش على ولادكم لانهم
كده كده ساقطين
مع تحياتى
المعلم دهشان العكر

معلومات لا زم نعرفها
اولا الاتانه هى الحماره الانثى
ثانيا الزعربانه هى الحمار حديث الولاده( بيبى يعنى)
اما الحراث فهو الذى يقوم بحرث الارض قبل الزراعه
وللعلم والتذكير الليانه هى الارض الطينيه اللينه
وعلى فكره الالفاظ دى عربى صرف

والان مع الحلقه الثالثه من المسلسل الكوميدى

من فات قديمه

اتحاد الاذاعه والتلفزيون
بلاشتراك مع
(PATHWAYS TV) تلفزيون الباثواى

د كاسب وشركاه

يقدمون

(من فات قديمه)
بطوله
الاستاذ نحوى مرفوع بشده




بالاشتراك مع ابنته
الانسه كسره


والنجم الهابط
عوض الغبى

تاليف
صفوت ربيع
(ابوعمار السويفى)

تصوير

متوقع يعنى هاكتب مين انتا شايف فى كاميرات اساسا
ويقوم بدور الراوى
للاسف محش غيرى فى المسلسل ده
انا برده الراوى
انتاج

انا برده



اخراج
صفووووووووووووووووووووت

هذا المسلسل برعايه
سنتر المعلم دهشان للدروس الخصوصيه
للحجز والاسعلام
SBOOT_2010@YAHOO.COM


وبسرعه عشان الاماكن مش محدوده واحنا مش مستعجلين






الحلقه التالته
كان فى زمان رجل متعلم فى القريه ويحب اللغه العربيه
زى عنيه ومبيتكلمش الا بيها وكان اسمه الاستاذ نحوى
وكان عنده بنت اسمها كسره برده اتعلمت منه

الاستاذ نحوى: يا بنيتى اربطى الاتانه ( طبعا اتفقنا ان الاتانه هيا الحماره )
الانسه كسره: امرك يا والدى
وكانو على الحال ده كل يوم مبيتكلموش الا بالنحوى
او العربى الفصيح اوى
وفى يوم من الايام كان الاستاذ نحوى رايح الغيط
وماشى بالاتانه قصدى الحماره وهوب غرست فى الطينه
انا قصدى الحماره مش العربيه
وصاحبنا اتجن وجرى يدور على حد يطلع له الحماره من الطينه
س حظو الوحش وقعو مع عوض الغبى اللى شغال فى الارض
متيجو نشوف الحوار بتاعهم
الاستاذ نحوى: يا حراث يابن الحراثين ياللى ابوك وجدك فنيو فى الحراثه
عوض الغبى: ها بتقول ايه يا راجل انتا انتا بتشتمنى ولا ايه
وطبعا هو ولا بشتموا ولا حاجه ده كده بيناديلو بوظيفتو يعنى هوا حراث
الاستاذ نحوى: انتا يا حراث يا ابن الحراثين ياللى ابو وجدك فنيو فى الحراثه تعالا طلع الاتانه بنت الاتانه وحلت فى الليانه وبنتها الزعربانه فى البيت تصيح
عوض الغبى: ها بتقو ايه
الاستاذ نحوى: بقولك الاتانه بنت الاتانه وحلت فى الليانه وبنتها الزعربانه فى البيت تصيح
عوض الغبى: يا راجل انتا بتقول ايه انتا بتكلمنى انا
صاحبنا بقولو ان الحماره بنت الحماره ووحلت يعنى غرست فى الليانه وبنتها فى البيت بتعيط عليها
الاستاذ نحوى: بقولك الاتانه بنت الاتانه وحلت فى الليانه وبنتها الزعربانه فى البيت تصيح
عوض الغبى: يا راجل انتا باين عليك مجنون ولا ايه
الاستاذ نحوى: فلتاتى معى لاريك الاتانه وهي فى الليانه
عوض الغبى: خليا ورا الكداب
الاستاذ نحوى: انظر ان الاتانه تصيح فى الليانه هيا اغثها فان ابنتها الزعربانه تبكى عليها فى البيت
عوض الغبى: يا راجل يا عبيط انتا قصدك على الحماره
الاستاذ نحوى: لا انها الاتانه
عوض الغبى: بئا انتا يا راجل جايبنى معاك لغايه هنا عشان تتمألت عليا طب انا هوريك شغلك
صاحبنا عوض طلع الفرقله( الكرباج ) وقاله دى اسمها حمار واستاذ نحوى مرديش يلم الدور وقاله لا اتانه
وهوب عوض نزل بالفرقله على ضهر استاذ نحوى لمع خلاه ندم وسأله
عوض الغبى: دى اسمها ايه
الاستاذ نحوى: طبعا حماره حماره حماره حماره ( وهو يتوجع )
عوض طلعلو الحماره ومشى الاستاذ نحوى
ولما روح قابل الانسه كسره بنته
الاستاذ نحوى: يا بنت اربطى الحماره
الانسه كسره : سلامه نحويك يا ابتى
الاستاذ نحوى : حراث يكسر نحويكى كما كسر نحو ابيكى
النهايه

السؤال الاخير هنا مين هوا الغلطان ؟؟
الاستاذ نحوى ولا عوض
سؤال يا ريت الاقى رد عليه
انا عايز رد بجد مش هزار
يالا بئا استنونى الحلقه الجايه

السبت، 21 مارس 2009



بسم الله الرحمن الرحيم


بعد قليل الحلقه الثانيه من المسلسل العربى من فات قديمه



فاصل اعلانى
بلاص ام الهنا
احدث انواع البلاليص
يختلف تماما عن كل بلاليص الحكومه
قادر على الاحتفاظ بالمياه لذا فهو يختلف عن بلاص الرى
موفر للنقود افضل من بلاص الماليه
غير مهلك للكهرباء فهو افضل بكثير من بلاص الكهرباء
مفيد جدا للطلاب افضل من بلاص التعليم
يمكنك استخدامه كمنزل صغير ليغنيك عن بلاص الاسكان
افضل هديه للدول الخارجيه افضل بكثير من بلاص الخارجيه
يساعدك فى النظام الداخلى يفوق بلاص الداخليه
تحفه فنيه يفوق جمالها بلاص الثقافه
وسلملى على اليونسكو
غير ملوث للبيئه بعكس بلاص البيئه
من خلاله نسقى ارضنا افضل من بلاص الزراعه




والان مع المسلسل العربى من فات قديمه

اتحاد الاذاعه والتلفزيون
بلاشتراك مع
(PATHWAYS TV) تلفزيون الباثواى

د كاسب وشركاه

يقدمون

(من فات قديمه)

بطوله نجمه الترعه الشرقيه

ستيته البخيله

بالاشتراك مع

نجم حوض ولاد ابو اسماعيل

هيثم تامر الحمش

تاليف
صفوت ربيع
(ابوعمار السويفى)

تصوير

متوقع يعنى هاكتب مين انتا شايف فى كاميرات اساسا

انتاج

(PATHWAYS TV) تلفزيون الباثواى

د كاسب وشركاه

اخراج
صفووووووووووووووووووووت

هذا المسلسل برعايه

بلاص ام الهنا
يا ريت اللى ميعرفش يعنى ايه بلاص
SBOOT_2010@YAHOO.COM/




وميتكسفش









الحلقه الثانيه

بعد ما مشى برعى اخو ستيته الحلقه اللى فاتت
بعد زياره قصيره دامت شهر فقط زى ماحنا فاكرين الحلقه اللى فاتت
انتا مش فاكر لا ارجع للحلقه الاولى الاول احنا مسلسلناقايم على الترابط هاسيبكم خمسه تراجعو الحلقه اللى فاتت
هنرع بعد شويه
وان مرجعناش
دى بتاع ربنا

ـ
قريبا جدا ً على ملتقى بنى سويف
اخر اخبار بنى سويف من مصادرها الموثوقه
مع ابو عمار السويفى
انتظرونا

ـ

عالم المدونات
مدونه فى الشارع
http://www.fielshare3.blogspot.com/

لنسلط الضوء على الاحداث المصريه

ـ

مدونه شخابيط سويفيه

المدونه الجماعيه لمدونى بنى سويف



ـ

الحمد لله رجعنا


تامر الحمش طبعا متدايق بعد ما اتجوز ستيته ملكه جمال الكفر هيا سنه واتغير الحال وبقت شكلها استغفر الله العظيم
وطبعا ستيته معذوره كانت فاكره تحت القبه شيخ
وطلع تامر بيكمل عشاه نوم
المهم تامر الحمش قاعد يندب حظه
ويقول
سوق الهلايل مليان دشاير بس اللى يلم وكل من جابله دشيره ترقد لو فى البيت وتعن
طبعا فاهمين الكلام ههههههه
قصدو سوق الهلايل مليان دشاير (الدشيره هيا الحماره السمينه)بس اللى يلمها وكل اللى يجيب حماره يقصد ستيته طبعا ترقد فى البيت وتعن من المرض عندك حق معظم النسوان بعد الجواز كده
وطبعا ستيته متغاظه قامت ردت عليه وقالتله
بطل يا راجل يا مهبول ياللى بشتك لحد الكوع
من ساعه ما اخدتك وانا فى الجوع
وكمان بخدم

اكييييييييييييييييييييييييييييييييييد عارفين ايه ده
قالتله اسكت يا راجل يا اهبل يالى بشتك
يعنى جلابيتك ( جلباب ) لحد كوعك قصيره من الفقر من يوم ما اتجوزنا واحنا فى فقر وكمان صابره وبخدمك لا اصيله يا ستيته
رد بقى يا عم تموره
صاحبنا تيمور رد وقال
بس يا مره يا مختله
مش فاكره لما جبتك من الجله
سخنتلك دستين وحله
بقى اشفك نازل يتجلى

دى بقا مش محتاجه توضيح من الاخر الكلام اختلف بيقولها انه لما كان متجوزها مكنتش نضيفه وهوا اللى نضفها
اخخخخخخخخخ هو احنا فينا من كده هنقلب فى اللى فات
جبتو لنفسك ستيته اتجنت وقالتله
بس يا راجل يا مجنون
بكره راح انزل السوق
اجبلك وقتين سم

طبعا ستيته اتجنت واتنرفزت قالتله انها هتروح عند العطار واجبلك سم واسمك ربنا يمسيك بالخير يا شرانى طبعا فاهمنى يا كلاس ايه

طبعا تموره الحمش خاف دى فيها سم يا جدعان ام رد عليها رد دبلوماسى وقالها
على ايه راح تسمينى عند القاضى واخلعينى
وخدى حقك ومنيش معدم

قالها بدل ما تسمينى وتتعبى نفسك ونيابه ومحاكم عند القاضى واخلعينى وخدى حقك وانا مش معدم فلوس
طبعا متسألوش ايه اللى حصل بعد كده لان دى نهايه الحكايه وشكرا
ً
النهايه


هذا المسلسل برعايه

بلاص ام الهنا






الى القاء مع الحلقه القادمه

الأحد، 8 مارس 2009

نبدأ حلقات مسلسل ** من فات قديمه **




بسم الله الرحمن الرحيم

نبدأ الحلقه الاولى من مسلسل من فات قديمه

الحلقه دى بعنوان( برعى وستيته)

اول حاجه ننزل بالتتر

بطوله برعى

بالاشتراك مع نجمه الترعه الشرقيه ستيته البخيله

سيناريو وحوار انا ابوعمار السويفى

انتاج تليفزيون الباثواى د كاسب وشركاءه

اخراج انا برده صفووووووووت

حقوق الطبع محفوظه لتليفزيون الباثواى (pathways TV)

يبدأ المسلسل بمجيئ برعى ( السئيل جدا ً ) زياره على اخته ستيته ( البخيله جدا ً جدا ً)

المهم صاحبنا اكل ونام ولما طلع عليه النهار قابل اخته ستيته وقالتله

الشمس طلعت واتجلت واللى عنده ضيف يتسلت

بمعنى ان الشمس طلعت فى السماء واللى عنده ضيف يتفضل يمشى (ناصحه بتطرده بالشعر والمثال )

ام صاحبنا رد عليها وقال

وحياه من حلاها وجلاها الضيف ما يمشى الا ان ملاها

صاحبنا حلف باللى طلع الشمس ان ما هايمشى الا ان اكل وشبع

فردت عليه ستيته الخبيثه

يا عجين ياللى عجنتك بكره قومه وبعد خبزتك

يعنى هيا عجنت العجين وبكره هيختمر وبعده هتخبزه يا مين يعيش

صاحبنا عطالها الرد القاطع وقال

يا شهر ياللى هليت فى اولك جيت وفى اخرك مشيت

وقطع عليها طريق الرجعه وقالها ان هوا قاعد لاخر الشهر علما انه لسه فى اول الشهر

النهايه وانتظروا الحلقات القادمه


السبت، 24 يناير 2009

اترك الهم ينساك وان افتكرته سلاك







اترك الهم ينساك
فى حد سمع المقوله دى قبل كده
طب اللى سمعها يعرف معناها والقصه بتاعتها
هو ده اللى هتكلم فيه
المقوله دى معناها بكل بساطه " الابتعادعن ذكر الهموم لان تذكرها سيكثر منها"
اما عن القصه بتاعتها فهى كالتالى
يحكى انه هنال جلاد اسمه حسن"يبيع الجلود ويشتريها" وكان يعيش مع امرائته فى عيشه سعيده وكان كلما كسب اى اموال من عمله وضعها فى الكور"جلد الماعز" وفى يوم من الايام مر من امام امراءه جلاد اخر فقامت ببيع كل الجلود بما فيها هذا الكور فلما غضب حزن واخ يضرب على السندان"حديده لصنع الجلود" ويقول "اترك الهم ينساك وان افتكرته سلاك يا محسنك يا كور عند اللى اشتراك........................كوِِِر ياحسن كور"الى ان مر عليه فى احد الايام الملك وسمعه وسأله لما يقول ذلك فاخبره عن القصه فتعجب الملك
وقام بجمع كل الجلادين من المملكه واخذ كل الجلود الى ان وجد مال حسن الجلاد فاعطاه له
بس هى دى القصه
بس ايه رايكم متيجى نترك الهم .....

الخميس، 1 يناير 2009

هما فين

هما فين
مش سامع صوتهم ليه
متقوليش هما مين
كل الناس بقوا شايفين
اللى بيحصل فى فلسطين
ولا هما يمكن نايمين
برده مش عارف هما مين
لا مش قصدى المسلمين
دول خلاص متعودين
الذل بقا عار على الجين
والصمت والبكا الحزين
هو سلاحهم المتين
برده مش عارف هما مين
لا مش الجماعه الحقوقيين
من كلامهم تعبنا سنين
ومن الفعل محرومين
لكن والحق يتقال
هما على الضعيف شغالين
ومن امريكا يا ناس خايفين
ونقول تانى احنا عايزين صلاح الدين
ليه هوا احنا مش بنى ادمين
عرفت بقا هما مين
الرجاله الوطنيين
هما الامل ورب العالمين
متقولى بقا هما فين

الثلاثاء، 16 ديسمبر 2008

جزمه فى وش كل جبان


جزمه فى وش كل جبان


(منتظر) وباذن الله منتصر

(منتظر) واهو جاء الاوان

وقدرت تقولها للامريكان

كلمه مش باللسان

بس دى كانت كالبركان

كلمه فى وش الطغيان

كلمه لبوش واوباما كمان

والجزمه كانت العنوان

جزمه ما كانت فى الحسبان

كانت الرد لكل جبان
حاول اهانه الانسان
الصحفى ده سلاحه القلم
اما انت فكان القلم جزمه فى وشه يا فنان
(ابو تريكه) ولا (انالكا) لا ده (الزيدى) ياجدعان
دى لا فوضه ولا همجيه
دى من صور الديموقراطيه
مش دى برده الحريه
ردو ورايا وقولو كمان
يسقط بوش والامريكان